संपता श्रावण मास तो,
मानोन जाणत्याचा उपदेश,
त्वरित सन्मानाने प्रवेश,
मद्यप्रांती करावा ||१||

मद्यपान हा शुभप्रसंग,
साजरा करावा होवोन गुंग,
मात्र अतिसेवनी अतिप्रसंग,
कदापीही करो नये ||२||

ते दिनी बाजारहाट करावा,
'देठ', कोंबडा, सरंगा आणावा,
छान मसाल्यात पकवावा,
पिण्यानंतर खावया ||३||

चणे, दाणे, चमचमीत खाणे,
त्यास 'चकणा' ऐसे बोलणे,
'चाखणे' हा खरा शब्द जाणणे,
म्हणोन तोच वापरावा ||४||

कोंबडीचे तुकडे बारके,
मसाल्यात तळोन सारखे,
पेयपानप्रसंगी खावे थोडके,
त्यास म्हणती 'आरंभक' ||५||

श्रेष्ठ प्रतीचे मद्य आणोन,
प्रमाणात चषकात ओतोन, 
पाणी, 'कर्बवायुजल' मिसळोन,
उचलोन म्हणावे "चांगभले" ||६||

मित्रांसह जमवावा 'पेयप्रसंग',
हास्यविनोदाचा उडवावा रंग,
मद्यापेक्षा तीच खरी झिंग,
हेच सत्य जाणावे ||७||

कवी रसिक कुलोत्पन्न,
त्याने रचिले हे उपदेशवचन,
असे जरी अल्पमति, अल्पज्ञान,
तरी भाव मात्र अनन्य ||८||
.......................................
•आरंभक=स्टार्टर,
• कर्बवायुजल=सोडा,
• चांगभले=चिअर्स
• पेयप्रसंग=पार्टी.🍺🍺🍺